تكريم الاستاذ كمال الخولى بشركة جابكو -بترول خليج السويس

حكايتى مع عبد البصير بقلم نصر عبد الحميد

شاعر العاميه المنسى
تصدق انى توهت فى ميدان التحرير ايوه توهت فى الميدان وأنا كبير
روحت الخارجية ومجمع التحرير ايوه وحلمت كمان انى سفير
قدمت شهادات ومستندات كتير وسافرت بلاد الهند وكشمير
توهت يا خايب ف التحرير أدى اخرة السطل والتخدير
لا حصلت سفير ولا غفير ماتيجى اعزمك على عصير
تصدق نفسى فى ايه يا كبير اشتغل يوم واحد وزير
وتعمل ايه يا جناب السفير ف زحمة ميدان التحرير
قلبت عليه المواجع ياعب بصير
أمبارح ماشى فى العتبة ومعدىناحية المطافى
شميت ريحه نار هابه اتارى جسمى سخن ودافى
ووصلت عند البوسطة شميت ريحة تانية عطرة
ريحة جوابات حب دافى وهناك ف ميدان الأوبرا
لقتنى بزعق بصوت جافى اتخضيت فين الأوبرا
صدتنى ولا حياة لمن تنادى هى دى الكارثة الكبرى
شافنى صاحبى عبد الشافى قال لى هس حريق الاوبرا
ونصحنى أنام ح اقوم متعافى
نمت حلمت الأوبرا جراش فهمت أن الازمة متستناش

سيدنا الوالى نام متعشاش فكرت تتحل الازمة ببلاش
ويكدنا سيدنا ويحل كاش بس العموله هامة ومتنساش
ضيعنا تاريخنا ومدرناش كمان ضاع العمر ومتهناش
وتوهت أنا كمان فى العتبة زى عب بصير فى التحرير
ماتسمعنى أغنية محمد منير

صباح الخير يا مصر تحية شاعر العامية -نصر عبد الحميد
صباح الهدى والرضا والكلام المليح
صباح الدعـوة الطيبة والفأل المريح
صباح سلام بإيمان ودعاء والتسبيح
صباح لشروق الاسلام وبشارة المسيح
صباح الهمة والعمل بذمة وكفاح
صباح ألامل بالعمل والحلم بالسماح
صباح الخير يا مصر
صباح الخير يا مصر يا زهرة البساتين
صباح النصر يا خير جند العالمين
صباح جميل على اهل مصر الطيبين
صباح الفل يا ورد على ياسمين
صباح الود و الحب يا كل العاشقين
صباح عافى ودافى يا شمس المحبين
صباح الاجتهاد وحب مصر للمجتهدين
صباح الهمة والذمة وتحية للشقيانين
صباح الكفاح لكل فلاح والمزارعين
صباح حصاد سنابل قمح الفلاحين
صباح الخير يا مصر
صباح الثقافة و أهل مصر المثقفين
صباح القلم سراج الصحف والصحفيين
صباح المهارة وأهل الجدارة والفنانين
صباح الالتزام واحترام كل المخلصين
رجالة مصر العدالة العيون السهرانين
صباح لكل رموز العمارة وعمار السنين

وتحيه لكتاب تاريخ حضارة المصريين
صباح الخير يا مصر

عشانك يامصر بقلم نصر عبد الحميد شاعر العاميه المنسى

عشانك يا مصر ومهما نعانى

كيانك نصون بكل المعانى

بزمانك نكون ونحقق أمانى

ونردد أسمك باحلى أغانى
وتزيد امجادك بأيد ولادك
وعشان عيونك يامصر
عشانك يا مصرى وحلمك أكيد

فى نومك وقومك فى عملك عنيد

وبمر يومك ظروفك وهمومك تزيد

ونسأل ربك يهون عليك
عشان عيونك يامصر

أسعى لرزقى بمكسب حلال

وأربى ولادى وأحقق امال

اقضى حياتى مسالم وعال
وافنى عمرى محافظ عليك
عشان عيونك يا مصر

اجتهد فى عملى بذمة وضمير

أخلص ف شغلى وانتج كتير

واتقدم ببلدى فى وقت قصير

واسال المولى يدوم عليك

نعم الكيان والمصير

وعشان عيونك يامصر

خواطر نصر عبد الحميد -شاعر العامية المنسى
يا أهل الله
يا أهل المدينة و الحضر والريف
يا ضحكة حزينة بالترف و الزيف
اسمعوا الحكاية والسمع ع الكيف
إلهي يجعل كلامنا عليكم خفيف
يا أهل الله
فيه ناس حافية علي الأرض بتدوس
وناس أكلها حاف جاف بلا غموس
وناس عيشتها مره وضنك ملموس
وناس صارفــه ببذخ جــــرة فلوس
يا أهل الله
يا أهل الـذوق والأدب والقيما
يا أهل الشوق والحب والسيما
يا أهل الغنـوة والطرب فيــــنا
يا أهل القــلم والكلـــمة لــــينا
يا أهل الله
وأنت يا اللى الزمن دق أبوابك
امتى تعرف العدو من أصحابك
لامتى تندم وترجع للى سابك
لا أنت طايل قسمتك ولا منابك
ارضى بنصيبك ورزق جه ببابك

وخليها على الله

مقلب مايتنسيش بقلم :نصر عبد الحميد شاعر العامية المنسى
اتعمل فيه مقلب مايتنسيش
شربته ف عزبة ابوحشيش
سمع هس وما تقاطعنيش
هس بس خروج مفيش
ندهت على ام كراميش
ليك جواب م المعلم ريش
يلا بسرعة وماتتأخريش
مش نقصك أنت والتفتيش
كفاية خصم ما بيرحمنيش
اهى جايه تتمخطر بشويش
بملاية وألوان ماتختشيش
تحته فضفاض زى الهيش
وحكاية من غير تشويش
اديتنى عصير مايتنسيش
عليه مكسرات وياميش
سقتنى بقيت شيش بيش
قالتلى تبصمنى ولا منويش
شوف صباعى وماتحسدنيش
خلصنى بسرعة ماتعطلنيش
ريحنى وانا اديلك البقشيش
لغاية هنا والباقى مايتحكيش
والبقية فموقع مناقيش قراقيش

سلامات ياكورة بقلم : نصر عبد الحميد
شاعر العامية المنسى
عشنا وشوفنا وياما حكايات
زمن العجايب ومصايب ستات
زمن الفراودة عدى وفات
فراودة الهجوم والنص والباكات
فين زمان وكرة البهوات
قال من قلة الشنبات
عملوا فرقة من الستات
فرقة شروق وكمان فتكات
خطة ولعب نظام تلاتات
وتعالى يا بطة الثعلب فات
سلامات يا كورة
فريق بهية والست نورة
والتانية عزة وسنية قورة
سفرية برة لماتش كورة
تلفزيون يصور بكاميرا عورة
ومجلة تنشر للحلوة صورة
والعجلة دايرة وتلف دورة
والرف صفر والست نورة
الله ينور شايطة كورة
لعبة هايلة والبصرة فورة
والفرقة شايلة غلب نورة
نتيجة باينة مش عايزة شورة
سلامات ياكورة